"Пагадненне памiж Урадам Рэспублiкi Беларусь, Урадам Лiтоўскай Рэспублiкi i Урадам Рэспублiкi Польшча аб стыку дзяржаўных гранiц Рэспублiкi Беларусь, Лiтоўскай Рэспублiкi i Рэспублiкi Польшча"

Зарегистрировано в НРПА РБ 22 ноября 2010 г. N 3/2616

Уступiла ў сiлу 26 кастрычнiка 2010 года.

Урад Рэспублiкi Беларусь, Урад Лiтоўскай Рэспублiкi i Урад Рэспублiкi Польшча, якiя далей называюцца Бакамi,

зыходзячы з прынцыпаў павагi да суверэнiтэту, тэрытарыяльнай цэласнасцi дзяржаў i недатыкальнасцi дзяржаўных гранiц,

прымаючы пад увагу неабходнасць вызначэння i абазначэння стыку дзяржаўных гранiц Рэспублiкi Беларусь, Лiтоўскай Рэспублiкi i Рэспублiкi Польшча,

дамовiлiся аб нiжэйпададзеным:

Артыкул 1

1. Стыкам дзяржаўных гранiц Рэспублiкi Беларусь, Лiтоўскай Рэспублiкi i Рэспублiкi Польшча (далей - стык гранiц) з'яўляецца пункт перасячэння лiнiй дзяржаўных гранiц, якiя ўсталяваны наступнымi дагаворамi:

Дагаворам памiж Саюзам Савецкiх Сацыялiстычных Рэспублiк i Рэспублiкай Польшча аб савецка-польскай дзяржаўнай гранiцы, якi быў падпiсаны 16 жнiўня 1945 года ў г. Маскве;

Дагаворам памiж Рэспублiкай Беларусь i Лiтоўскай Рэспублiкай аб беларуска-лiтоўскай дзяржаўнай гранiцы, якi быў падпiсаны 6 лютага 1995 года ў г. Вiльнюсе;

Дагаворам памiж Лiтоўскай Рэспублiкай i Рэспублiкай Польшча аб агульнай дзяржаўнай гранiцы, прававых адносiнах, што з ёй звязаны, а таксама аб супрацоўнiцтве i ўзаемадапамозе ў гэтай галiне, якi быў падпiсаны 5 сакавiка 1996 года ў г. Вiльнюсе.

2. Распалажэнне стыку гранiц паказана на Дэлiмiтацыйнай карце стыку дзяржаўных гранiц Рэспублiкi Беларусь, Лiтоўскай Рэспублiкi i Рэспублiкi Польшча ў маштабе 1:10000, якая з'яўляецца неад'емнай часткай гэтага Пагаднення.

Артыкул 2

1. 3 мэтай абазначэння на мясцовасцi стыку гранiц Бакi ўсталёўваюць пагранiчны знак "Марыха" ("Mara", "Marycha") (далей - пагранiчны знак).

2. Пагранiчны знак складаецца з трох пагранiчных слупоў, што па адным размяшчаюцца на тэрыторыях дзяржавы кожнага з Бакоў.

3. Бакi ўтвараюць Сумесную беларуска-лiтоўска-польскую камiсiю (далей - Сумесная Камiсiя) з мэтай распрацоўкi праекта пагранiчнага знака, пазначэння стыку гранiц, геадэзiчнага вызначэння каардынатаў пункта стыку гранiц, а таксама пагранiчных слупоў, састаўлення Пратакола пагранiчнага знака i Дэмаркацыйнай карты стыку дзяржаўных гранiц Рэспублiкi Беларусь, Лiтоўскай Рэспублiкi i Рэспублiкi Польшча.

Пратакол пагранiчнага знака, Дэмаркацыйная карта стыку дзяржаўных гранiц Рэспублiкi Беларусь, Лiтоўскай Рэспублiкi i Рэспублiкi Польшча i Заключны пратакол Сумеснай Камiсii складаюцца ў шасцi экзэмплярах, кожны на беларускай, лiтоўскай i польскай мовах, якiя з'яўляюцца неад'емнай часткай дэмаркацыйных дакументаў дзяржаў Бакоў.

4. Выдаткi, звязаныя з выкананнем сумесных работ, названных у пункце 3 гэтага Артыкула, Бакi аплочваюць у роўных частках.

Артыкул 3

1. Кожны з Бакоў робiць неабходныя захады з мэтай падтрымання ў належным стане пагранiчнага слупа пагранiчнага знака, якi знаходзiцца на тэрыторыi яго дзяржавы, i недапушчэння яго перамяшчэння, псавання, знiкнення або знiшчэння, а таксама захады, скiраваныя на забеспячэнне бачнасцi памiж пагранiчнымi слупамi пагранiчнага знака.

2. Бакi будуць рабiць узгодненыя захады, якiя забяспечваюць нязменнасць палажэння рэчышча ракi Марыха ("Mara", "Marycha") ў раёне стыку гранiц.

3. У выпадку прыродных змяненняў рэчышча ракi Марыха ("Mara", "Marycha") стык гранiц не мяняе свайго палажэння да той пары, пакуль Бакi пасля аналiзу змяненняў не дамовяцца аб iншым.

4. У выпадку перамяшчэння, псавання, знiкнення альбо знiшчэння пагранiчнага слупа пагранiчнага знака дзеяннi Бакоў рэгулююцца адпаведнымi палажэннямi мiжнародных пагадненняў дзяржаў Бакоў.

5. У выпадку адсутнасцi магчымасцi аднавiць пагранiчны слуп пагранiчнага знака на былым месцы Бакi ўзгодняць яго новае месцазнаходжанне i саставяць адпаведныя дакументы ў шасцi экзэмплярах, кожны на беларускай, лiтоўскай i польскай мовах.

Артыкул 4

Пытаннi, якiя ўзнiкаюць памiж Бакамi i датычацца рэалiзацыi палажэнняў гэтага Пагаднення, будуць вырашацца шляхам перагавораў.

Артыкул 5

Гэта Пагадненне ўступае ў сiлу ў дзень атрымання апошняга паведамлення, якое пацвярджае выкананне кожным з Бакоў неабходных унутрыдзяржаўных працэдур.

Гэта Пагадненне падпiсана ў г. Вiльнюсе 16 верасня 2009 года ў трох экзэмплярах, кожны на беларускай, лiтоўскай i польскай мовах, прычым усе тэксты маюць аднолькавую сiлу.

Дадатак
да Пагаднення памiж
Урадам Рэспублiкi Беларусь,
Урадам Лiтоўскай Рэспублiкi
i Урадам Рэспублiкi Польшча
аб стыку дзяржаўных гранiц
Рэспублiкi Беларусь, Лiтоўскай
Рэспублiкi i Рэспублiкi Польшча

ДЭЛIМIТАЦЫЙНАЯ КАРТА СТЫКУ ДЗЯРЖАЎНЫХ ГРАНIЦ РЭСПУБЛIКI БЕЛАРУСЬ, ЛIТОЎСКАЙ РЭСПУБЛIКI I РЭСПУБЛIКI ПОЛЬШЧА

*****НА ПАПЯРОВЫМ НОСЬБIЦЕ